April 08, 2012

and The Mad Country!

Again, a non- graphic design post, this time a poem by George Khabbaz titled 'خايف تخلص الدّني'. 
I'm posting this in commemoration of the Lebanese Civil War next week (13th of April) hoping this poem will shake something  inside everyone of us:
available on utube: link

Peace.
 
خايف تخلص الدّني و نحنا بعدنا نايمين 
عَ تخت الطّائفيّة و منتغطّى بالدّين 

خايف تخلص الدّني و غرقانين ببحر الكذب
منعلن ولاء الوطن و نحنا ولائنا للحزب
 
خايف تخلص الدّني و نحنا بالإسم أحرار
تقسّمنا لكتائب و عم ننجرف بالتّيّار 
و حبّ الوطن ما اكتمل و العمّال بلا عمل
و الكتلة الواحدة كِتَل و عم نفتّش عَ أمل 
و التّوحيد صفّى وحدات و الآخر ما منتقبّل
و القوّة صارت قوّات و عم بيضيع المستقبل
 
خايف تخلص و الظّلم أخد حقوقنا و ما ردّها
و النّاس اللّي لاحقة زعيم ما تلاقي حدا حدّها
يا شعوب النّوم اشتراكِ
طوّلتِ كتير النّومة يلّا قومي كفاكِ صارت بتحرز القومة  

خايف تخلص الدّني و ما أعرف ليلي من نهاري لا عدوّي من جاري و لا يميني و يساري
 
خايف تخلص الدّني و يا وطني نستحي فيك
ان سألوني إنتَ مين بقلّن شيعيّ أو كاتوليك
سنّيّ درزيّ مارونيّ أرمنيّ أو سريانيّ بروتستانتيّ أورتودوكس علويّ أو علمانيّ 
بعرّف عن حالي بطائفة و بنسى قلّن لبنانيّ
 
خايف تخلص الدّني و نحنا بعدنا مش فاهمين إنُّه الإنسان إنسان بغضّ النّظر هوّي مين
ما حدا نقّى إسمُه و لا حدا نقّى مينُه و لا حدا نقّى لونُه و لا شكلُه و لا دينُه
و عَ شو بعدنا مختلفين مقسّمين مشتّتين
و تحت عيون الشّمتانين منتدبّح بإسم الدّين
 
خايف تخلص الدّني و وطني زغّير تعبان
من ولادُه المقسومين مع فلان و فليتان
و بسمع صوتَك يا جدّي عم بيوشوشني بحنان يمكن تخلص الدّني و ما بتخلص قصّة لبنان
 
و متل ما قلّي جدّي بهاك القصّة من زمان يمكن تخلص الدّني لكن ما بيخلص لبنان!

No comments:

Post a Comment